كل شئ تحتاج أن تعرفه عن امتحان الأيلتس IELTS
لو مقدم على منحة أو هتكمل دراستك فى الخارج أو هتهاجر أو مقدم على فيزا أو هتشتغل فى شركة مالتى ناشيونال أو هتشتغل فى دولة أجنبية، فأنت محتاج تعرف عن الاختبار ده. فى المقال ده هنوضح كل حاجة أنت محتاج تعرفها عن اختبار الأيلتس.
فى البداية لازم تعرف إن الأيلتس مش كورس، يعنى مينفعش حد يقول باخد كورس أيلتس أو هاخد كورس أيلتس. الأيلتس هو اختبار وليس كورس، لكن أنت بتاخد كورسات تحضيرية للأيلتس.
إن شاء الله هوضح 7 نقاط فى الأيلتس من خلالهم هتقدر تلاقى أى إجابة لأى سؤال بيدور فى ذهنك.
1- ما هو الأيلتس(IELTS) وليه بنحتاجه
أنت أما بتروح تقدم على منحة أو على دراسة فى الخارج أو على شغل فى شركة مالتى ناشيونال فكل المؤسسات دى محتاجة تتأكد إن أنت هيكون عندك القدر الكافى من اللغة الإنجليزية اللى هيسمحلك إنك تعرف تتواصل مع أصدقاءك فى الشغل أو أصدقاءك فى الجامعة.
فـ بدلا من إن المؤسسات دى تختبرك بشكل فردى اتجهوا لطرف ثالث والطرف الثالث ده 3 مؤسسات هما:
1- Cambridge Assessment English
2- British Council
3- (International Education Specialists (idp
الـ 3 مؤسسات دول عملوا اختبار الأيلتس ودول 3 مؤسسات معتمدين ونتايجهم معتد بيها، ف فـ أنت كدة محتاج الأيلتس علشان تثبت للمؤسسة أو الهيئة اللى أنت رايح لها إن أنت كويس فى الإنجليزى وهتقدر تتعامل مع الناس.
2- أنواع الأيلتس
الأكاديمى(ACADEMIC): اللى أنت بتمتحنه أو بتحتاجه أو ما بتروح تكمل دراسة أو تقدم على منحة.
الجينرال (GENERAL): اللى أنت بتحتاجه أما تقدم على هجرة أو عمل.
3- أقسام الأيلتس وتفاصيلها
الاختبار هيمتحنك فى 4 مهارات
1- Reading
اختبار القراءة بتكون مدته 60 دقيقة بتجاوب فيها على 40 سؤال بناء على القطع اللى أنت بتقرأها.
2- Writing
اختبار الكتابة بتكون مدته 60 دقيقة وبينقسم إلى قسمين إما ريبورت أو مقال على حسب الاختبار بتكتبه وبيكون عدد كلماته أقل حاجة 150 كلمة. وبيطلب منك مقال تانى تكتب فيه 250 كلمة.
3- Listening
اختبار الاستماع بتكون مدته 30 دقيقة بتجاوب فيهم على 40 سؤال بناء على محادثات هتسمعها.
4- Speaking
اختبار التحدث بتقعد أمام شخص بيكلمك لمدة من 11 دقيقة لـ 14 دقيقة ومن خلال كلامك معاه بيقيم أو بيحدد مدى كفاءتك فى التحدث باللغة الإنجليزية.
4- درجات الأيلتس ومعانيها
هل الأيلتس فيه نجاح ورسوب؟
بتعرف أنت محتاج تجيب كام الاختبار من خلال الهيئة اللى بتقدم فيها، مثلا الجامعات بتطلب الدرجات من 6 لـ 7، مثلا لو منحة من 5.5 فما يزيد.
بتاخد درجة من 1 لـ 9 فى كل قسم من أقسام الاختبار اللى هى القراءة والكتابة والتحدث والاستماع وبعدين بيقسموا المجموع الكلى على عدد الأقسام اللى هو 4.
ودرجات الأيلتس هى أرقام صحيحة أو رقم ونص، يعنى مثلا 4 أو 5 أو 6 أو 7 أو 4.5 أو 5.5 أو 6.5 أو 7.5، مفيش درجة بتاخدها اسمها 4.6 أو 4.7 أو 5.3.
شهادة اختبار الأيلتس مدتها سنتين فقط
5- أهم نصيحة قبل الأيلتس
ضرورى يكون فيه مدرس لغة إنجليزية أو أى شخص آخر عنده علم باللغة يبدأ يصحح لك ويتابع معاك، لأن مهما تكتب كتير ومفيش شخص على علم باللغة يصحح لك ويقولك أخطاءك وإيه الحاجات اللى عندك عاوزة تتظبط وتركز مش هتعرف من نفسك أنت كاتب صح ولا لا وبتنطق صح ولا لا.
6- مصادر هتساعدك للتحضير للأيلتس
فيه العديد من المصادر اللى هتساعدك للتحضير لاختبار الأيلتس، ولكن هرشح لك مصدرين ممتازين جدا فى تأهيلك لاختبار الأيلتس. المصدر الأول قناة دليلك للأيلتس لـ اليوتيوبر عبدالرحمن حجازى، والشخص ده محتوى قناته عن الأيلتس وبيشارك كل حاجة عن الأيلتس.
والمصدر الثانى موقع يوجلش(YouGlish)، الموقع ده بتكتب فيه الجملة أو الكلمة وبيجبهالك فى سياق حوار من خلال فيديوهات يوتيوب.
7- الفرق بين الأيلتس والتوفل(Toefl)
IELTS
وهواختصارلـ International English Language Testing System،هذا الاختبار ناتج عن مؤسسات بريطانية أو بمعنى آخر الاختبار ده بتديره المؤسسات البريطانية.
وهو اختصار لـ Test Of English As A Foreign Language، هذا الاختبار ناتج عن مؤسسات أمريكية أو بمعنى آخر الاختبار ده بتديره المؤسسات الأمريكية.
والهدف من الاختبارين هو قياس كفاءتك فى اللغة الإنجليزية
طيب أنت هتاخد اختبار أيلتس ولا توفل؟؟
إجابة السؤال ده بناء على المؤسسة اللى أنت هتقدم ليها، بمعنى لو المؤسسة اللى هتقدم ليها بتقبل توفل فقط فأنت لازم تحضر التوفل والعكس لو المؤسسة اللى هتقدم ليها بتقبل أيلتس فقط لازم تحضر الأيلتس.
وفيه مؤسسات بتقبل الاختبارين، فأنت فى الحالة دى هتشوف الأنسب ليك فيهم وهتحضر له وتختبره.
أتمنى تكونوا استفدتوا من المقال ولقيتوا إجابات للأسئلة اللى عندكم عن الأيلتس.
لو استفدت من المقال وعرفت لأول مرة معلومات جديدة متنساش تشاركنا رأيك فى التعليقات، ومتنساش تعمل متابعة للموقع علشان يوصلك كل جديد.
